Íslensku menntasamtökin ses voru stofnuð á grundvelli starfs sem Böðvar Jónsson, lyfjafræðingur á Akureyri, hóf árið 1997. Böðvar var ósáttur við uppfræðslu barnabarna sinna og fékk brennandi áhuga á skólamálum. Hann frétti af starfi menntasamtakanna "The Council for Global Education" í Bandaríkjunum og bauð einum stofnanda þeirra, dr. Sunita Gandhi, til Íslands í apríl 1997. Að frumkvæði hans buðu ýmsar stofnanir Dr. Gandhi að halda fyrirlestra, þar á meðal Heimili og skóli og Kennaraháskólinn í Reykjavík. Allmargir hafa síðan fengið áhuga á hugmyndafræði "The Council for Global Education" og hún hefur verið tekin upp í starfi þriggja skóla, Hrafnagilsskóla, Smáraskóla og Grunnskóla Önundarfjarðar. Grein er gerð fyrir starfsemi þessara skóla hér á vefsíðnunum. Að auki hafa þjálfunarnámskeið kennara og almennir fundir vakið athygli almennings og fjölmiðla.

Samþykkt var í samráði við stjórn The Council for Global Education að starfið á Íslandi yrði gert formlegt undir nafni Íslensku menntasamtakanna og þau fengju fulla aðild að "The Council for Global Education" í Bandaríkjunum. Skriður komust á þetta þegar ákveðið var að gera tilboð í skólann í Áslandi í Hafnarfirði og formleg viðurkenning stjórnvalda á ÍMS sem sjálfseignarstofnun, sem rekin er án hagnaðarsjónarmiða, var talin henta stefnumiðum samtakanna betur. Málið var kynnt þeim sem höfðu komið að þessu starfi á undanförnum árum og þeir einstaklingar sem taldir eru upp hér að neðan samþykktu að taka sæti í ráðgjafanefnd samtakanna. Samtökin munu beita sér fyrir ýmiskonar verkefnum til stuðnings menntastefnu "The Council for Global Education" og þau fela í sér aðstoð af ýmsu tagi við alla skóla sem hafa áhuga á þessari skólastefnu, m.a. þjálfun kennara og hvatningarverðlaunum. Skólaverkefnið í Hafnarfirði verður eitt þessara verkefna.

Ráðgjafar:

• Andri Ísaksson, fyrrv. prófessor við Háskóla Íslands
• Herdís Egilsdóttir, kennari
• Áslaug Brynjólfsdóttir, fyrrv. fræðslustjóri í Reykjavík

   
• Jón Baldvin Hannesson, skólaráðgjafi
• Rúnar Sigþórsson, skólaráðgjafi og lektor við Háskólann á Akureyri
• Karl Frímannsson, skólastjóri Hrafnagilsskóla
• Anna Guðmundsdóttir, aðstoðarskólastjóri Hrafnagilsskóla
• Halldóra Björnsdóttir, ráðgjafi og útgefandi
• Kristján Kristjánsson, prófessor við Háskólann á Akureyri
• Valgerður Snæland Jónsdóttir, M. Phil.
• Sigurður Björnsson, lektor við Kennaraháskóla Íslands
• Guðrún Pétursdóttir, forstöðumaður Sjávarútvegsstofnunar Háskóla Íslands
• Jónína Bjartmarz, alþingismaður og formaður samtakanna Heimili og skóli